Республика үрдүнэн булчут күнүгэр аналлаах үгүс тэрээһинтэн уратылара, сонуннара - республика үөрэнээччилэрин аһаҕас спартакиадалара. Манна эр киһи, уол оҕо аар айылҕатыгар сылдьан билиэхтээх билиитин, сатыахтаах сатабылын тургутан көрүү буолла. Дьокуускай аатын - "Айыы Кыһатын" үөрэнээччилэрэ Владимир Шамаев (9 кылаас), Дмитрий Захаров (9 кылаас), Владимир Рожин (9 кылаас), Елизавета Апросимова (8кылаас), Мария Попова (8 кылаас) көмүскээтилэр. Санатан эттэххэ, биһиги оскуола хаһан да дьиэтэ-уота суоҕуттан оҕо ситиһиитин, дьулуурун хааччахтаабат үгэстээх. Төттөрүтүн, төһө да 4 сиринэн үөрэх ыытылларын иннигэр - оскуолабыт оҕолоро төрөппүттэрин уонна учууталлар көмөлөрүнэн араас чыпчаалы дабайаллар - ол предметнэй олимпиадалар, научнай-практическай конференциялар, маассабай-культурнай көрүүлэр, спортивнай күрэхтэһиилэр, ырыа-үҥкүү түһүлгэлэрэ, байыаннай-патриотическай көрүүлэр, о.д.а. Бу да сырыыга тыҥааһыннаах киирсии түмүгэр - бастыҥ визитка иһин 1-кы миэстэ, булчут сатабылын көрүүгэ 2-с миэстэ, ытыылаах эстафетаҕа 2-с миэстэ уонна уопсай түмүгүнэн - ҮҺҮС МИЭСТЭ буолары ситистилэр. Бу куорат оскуолатыгар улахан кыайыы. Ол аата, биһиги төһө да айылҕабытын кытта алтыһыыбыт аҕыйаҕын иннигэр, төрүт үгэспитин сөргүтэр, илдьэ сылдьар кыахтаах эбиппит диэн түмүккэ кэлэбит. Биллэн турар, бу ылбычча кэлбэтэх ситиһии. Ити иннигэр үгүс үтүмэннээх үлэни, маҥнай утаа директорбыт Л.П.Шамаева иилээн-саҕалаан муҥха, куйуур, уһаныы, о.д.а. дьарыктарын тэрийэн, кэлин эр дьон учууталлары күүскэ түмэн, билигин ити үлэни уон хайысхалаан Н.В.Андреев салайааччылаах оскуола эр дьон учууталлара салайаллар. Кинилэр истэригэр РФ спордун туйгуна З.И.Федоров, И.П.Черноградскай, В.В.Могдоев, В.А.Слепцов, быйылгыттан С.А.Степанов, П.О.Липатов бааллар. Ону таһынан, төрөппүттэр хаһан баҕарар күүскэ көмөлөһөллөрүн, оҕо сайдарын туһугар оскуоланы кытта үгүстүк алтыһалларын бэлиэтиир оруннаах. Былырыыҥҥыттан үлэтин тэтимирдибит Аҕа түмсүүтэ онуоха улахан төһүү буолар. Инникитин да оҕолорбут төрөөбүт тылларын, үгэстэрин билиилэригэр, сайаҕас саха буолалларын өйдүүллэригэр күүспүтүн түмүөҕүҥ, санаабытын холбуоҕуҥ!
Рустам КАЖЕНКИН, "Айыы Кыһата" оскуола директорын иитэр үлэҕэ солбуйааччы |
|
© 2004 Якутское городское управление образования
При использовании материалов сервера ссылка на источник и этот сайт обязательна. |