Управление образования г. Якутска

Айыы Кыһатыгар үөрэх дьылын түмүктүүр чуораан чугдаарда 21.05.2014 16:11

Айыы Кыһатын уон биирис кылааһын (салайааччы О.П.Сухаринова) быйыл 24 үөрэнээччи уонна тохсус кылааһын (салайааччылар И.П.Пермякова, А.П.Посельская) 39 үөрэнээччи түмүктүүр. Кинилэргэ аналлаах "Тиһэх чуораан" күнэ бүгүн "Модун" спорт-комплекс киэң саалыгар буолла.

Оҕолору Дьокуускай куорат Үөрэх салалтатын аатыттан А.И.Эверстова, оскуола дириэктэрэ Л.П.Шамаева сахалыы хомоҕой тылынан, дохсун тойугунан эҕэрдэлээтилэр. Үгэс быһыытынан, уон бииристэри онус кылаастар, оттон тохсустары ахсыс кылаастар ырыанан-тойугунан, үҥкүүнэн-битиинэн эҕэрдэлээн көрөөччү биһирэбилин ыллылар. Оттон хормейстер, Саха Республикатын үөрэҕириитин үтүөлээх үлэһитэ С.М.Шестакова салалтатынан туруорбут кылаастар хордарын саала бүтүннүү иһийэн олорон биир тыынынан иһиттэ.

Оҕолор харда тылларыгар үөрэппит учууталларыгар, кинилэри тилэх баттаһа иһэр кылаастарыгар өйдөбүнньүк кэс тылларын туттарыы  эмиэ бэрт иһирэх буолла. Биллэн турар, бу тэрээһиҥҥэ сүрүн болҕомтону туох да мөккүөрэ суох  уон бииристэр оһуор-мандар курдук түһэрбит вальстара, дьону барытын түмэ тардыбыт оһуохай буолла. Онустар ааттарыттан Света Андреева үтүө баҕа санааларын - хомусчут Валя Сторожева дьүрүскэн хатыламмат тылынан доҕуһуоллатан дьоро күнү олус киэргэттэ.

Төрөппүттэр, бу күннэргэ олус долгуйа, сүүрэ-көтө сылдьар дьон, махтанар дьонноругар: Н.К.Чиряевка, М.П.Колодезниковаҕа, Л.П.Шамаеваҕа, кылаас салайааччыта О.П.Сухариноваҕа үтүө тыллаах суруктары туттардылар.

Үгэс быһыытынан, оскуоланы бүтэрээччилэр иллэрээ сылтан саҕалаан оскуолаҕа чороон бэлэхтииллэр. Быйылгы үһүс чороон эмиэ бэрт ураты, үс атахтаах, хаппахтаах, киэҥ соҕус айахтаах мас чороон буолан биэрдэ.

Тиһэх чуорааны 11 кылаас кылаас ситиһиилээх үөрэнээччилэрэ Тимур Оконешников, Анастасия Чахова итиэннэ маңнайгы кылаас ситиһиилээх үөрэнээччилэрэ Сережа Старостин, Наташа Посельская тыаһатан, бу күн сүрүн туомун толордулар.

Айыы Кыһатын дириэктэрин иитэр үлэҕэ солбуйааччы

Р.Н.Каженкин