2015 сыл кулун тутар 16 күнүгэр Саха гимназиятыгар үгэскэ кубулуйбут "Саха тылын, литературатын, культуратын бастыҥ учуутала" күрэх буолан ааста. Бу тэрээһин сахалыы оскуолалар ситимнэрин сайыннарар Сэбиэт үлэтин чэрчитинэн иккис төгүлүн ыытылынна. Күрэхтэһиигэ эдэр кэскиллээх учууталлар кыттыыны ыллылар. Күрэхтэһии сыала-соруга - эдэр учууталлар талааннарын, кыахтарын, дьоҕурдарын дьоҥҥо-сэргэҕэ тиэрдии, инники суолларын тобулалларыгар күүс -көмө буолуу. Күрэхтэһии үс түһүмэҕинэн ыытылынна. Бастакы түһүмэх - аныгы ирдэбилинэн уруогу көрдөрүү; иккис түһүмэх - бэйэни билиһиннэрии, үһүс түһүмэх - талааны, дьоҕуру көрдөрүү. Учууталлар уруоктарын араас темаҕа ыыттылар. Уруоктар ис хоһоонноро даҕаны, ньымалара даҕаны киһини кэрэхсэтэллэр. Учууталлар уруоктарыгар, сүрүннээн, айымньылары чинчийии, ырытыы, тэҥнээн көрүү, түмүк оҥоруу о.д.а. ньымалары туһанан, оҕолор айымньылаахтык үлэлииллэрин ситистилэр. Манна ордук үрдүк сыанабылы Саха гимназиятын учуутала Ноев Степан Олегович, Физико-техническэй лицей учуутала - Протопопова Агафия Иннокентьевна ыллылар. Иккис уонна үһүс түһүмэххэ учууталлар айымньылаах улэлэрэ көһүннэ. Кинилэр дэгиттэр талааннаах учууталлар буолалларын бигэргэттилэр. Күрэхтэһии бары түһүмэхтэрин оҕолору кытта алтыһар тэрилтэлэр үлэһиттэрэ уонна оскуолаҕа уһуннук үлэлээбит, опыттаах учууталлар сыаналаатылар. Үс түһүмэх түмүгүнэн Физико-техническэй лицей саха тылын, литературатын учуутала Протопопова Агафия Иннокентьевна кыайыылааҕынан ааттанна. Атын учууталларга араас номинациялар ананнылар. Ол курдук: "Дэгиттэр сатабыллаах учуутал" аатын Саха гимназиятын учуутала Ноев Степан Олегович ылла; "Айар куттаах учуутал" аатын Саха политехническай лицей учуутала - Леонтьева Наталья Прокопьевна; "Уран тыл маастара" аатын "Айыы кыһата" оскуола саха тылын , литературатын учуутала - Попова Александра Лукинична; "Норуот үгэһин иҥэрээччи" аатын Марха 2 N-дээх орто оскуола саха тылын, культуратын учуутала - Борисова Раиса Николаевна; "Оҕо кутун тутар учуутал" аатын 26 N-дээх орто оскуола саха тылын, литературатын, культуратын учуутала - Пестерева Надежда Ильинична; "Чинчийээччи учуутал" аатын Дьокуускай куораттааҕы национальнай гимназия учуутала - Кириллина Күндэлиинэ Трофимовна ыллылар. "Саха тылын, литературатын, культуратын бастыҥ учуутала" аатын ылбыт Физико- техническэй лицей учууталыгар Протопопова Агафия Иннокентьевнаҕа анал бирииһи куораттааҕы Үөрэх управлениетын начальнигын эбээһинэһин толорооччу Любимова Ирина Павловна туттарда. Кыайыылаах учууталларга анал бэлэҕи Саха Өрөспүүбүлүкэтин Үөрэҕин министиэристибэтэ, Саха Өрөспүүбүлүкэтин С.Н.Донской аатынан Үөрэҕи сайыннарар уонна идэни үрдэтэр институт, П.А.Ойуунускай аатынан литературнай музей, Саха Өрөспуубулукэтин норуоттар дьыалаларыгар Департамена, Республикатааҕы оҕо-ыччат библиотеката курдук тэрилтэлэр туттардылар. Онон кыайыылаахтары эҕэрдэлээн туран, үлэлэригэр ситиһиилэри, доруобуйаны, дьолу-соргуну баҕарабыт. Бу тэрээһиҥҥэ көмөлөспүт тэрилтэлэр салайааччыларыгар барҕа махталбытын тиэрдэбит. Тэрээһин үрдүк таһымнаахтык барарыгар, тэрийсибит дьоммутугар В.В.Софронеева дириэктэрдээх Саха гимназиятын салалтатыгар, дириэктэри научнай-методическай үлэҕэ солбуйааччы Н.Ф.Васильеваҕа, оскуола учууталларыгар махтанабыт. Матырыйаалы бэлэмнээтэ Борисова М.Н., куораттааҕы методическэй холбоһук салайааччыта |
|
© 2004 Якутское городское управление образования
При использовании материалов сервера ссылка на источник и этот сайт обязательна. |